Kosmorama 2014

Ei videodagbok frå Kosmorama 2014 dukka opp då eg rydda i arkivet mitt. Betre seint enn aldri, sant?

Dette var min fjerde Kosmorama, og den fyrste etter at eg flytta heim til Rana. Sjølv om eg tykte filmprogrammet var godt, opplevde eg at det var litt som mangla. Filmfestival er eit forum for å få sjå filmar ein elles ikkje får sjansen til å sjå, og ein arena for møte mellom publikum, filmskaparar og bransjen. Men det skal også vera ei feiring av filmmediet. Slik eg minnast tidlegare Kosmorama, var heile byen med på feiringa. Det var ballongar på torget, flagg over Elgseterbrua og Adressa.no hadde nyheiter frå festival som toppsakar heile veka. Alle gjekk rundt med Kosmorama-vesker, Kosmorama-nøkkelband, Kosmorama-skjorter, Kosmorama-aviser osb. Det var langt fleire møte mellom publikum og filmskapar, både med kjapp Q&A etter filmane, debattpanel og ikkje minst masterclass-seminarar.

Eg forstår at det er budsjettet som avgjer alt, og eg er glad for at filmfestivalen let filmen ta førerang over fest. Men eg merka etter Kosmo 14 at eg sakna litt. Sidan då har eg også vore Kosmorama i 2015 og no i 2016, og eg sit i grunnen att med same kjensle. Mykje bra film, men lite fest. Festen i filmfestivalen er flytta vekk frå festivalområdet. Kanonprisutdelinga skjer i heilt andre lokale (i 2004 var det i Clarion Hotel & Congress), og raud løper, filmskaparar og andre bransjefolk, glitter og stas er nesten ikkje til å sjå lenger. Tek du deg ein tur ut i byen, ser du ikkje snurten av Kosmorama-logoen nokon stad. Ingen Kosmorama-vesker. Ingen Kosmorama-aviser. Og møte mellom publikum og filmskapar er særs nedskalert, nedprioritert og knappast annonsert.

Så var det filmane. Eg tykte 2014-programmet var særs bra. Eg rakk å sjå 36 filmar og 1 seminar. Av desse var det 6 dokumentarar og 1 animasjonfilm. Språk som gjekk igjen var engelsk og spansk, men eg høyrte også arabisk, mandarin, hebraisk, for å nemna eit par språk. Mine favorittfilmar var:

• Gloria
• The Rocket
• Återträffen
• Locke
• Via Castellana Bandiera
• Det er meg du vil ha

Her er mitt fullstendige program for Kosmorama 2014: