Kva hender med vondskapsfulle imperium?

Ja, i praktisk bruk er MSO så absolutt dårlegare. MS Office 2007 har noko med det dummaste, teitaste, mest klønate brukargrensesnittet eg har prøvd i eit program. Eg vil ikkje påstå at OpenOffice har eit genialt grensesnitt, så langt i frå, men det er i det minste mogleg å forstå seg på ved fyrste rundtur. MSO2007 er ikkje det mogleg å forstå seg på utan lang opplæring, eller slik eg gjer det, med timesvis av prøving og feiling. Det er ille, ille, ille. Det hjelper ikkje på at programpakken er 5000 kroner. Det er ein svinpris. Særskilt når du veit at alternativet OpenOffice er gratis. Og det hjelper i alle fall ikkje at filformatet er kryptert og kjeldekoden er løynd, og du dimed aldri kan vita om mottakaren av filene dine får sjå det du vil at dei skal få sjå. OpenOffice kan alle i teorien sjå heilt korrekt, då teksten er lagra som XML. Prøv sjølv, opne ei OpenOffice Writer-fil i eit pakkeprogram (WinZip eller liknande), og hent ut content.xml. Opne denne i ein enkel teksthandsamar (Notepad eller liknande). Det du ser no, er teksten din med den formateringa du gav honom i OOW. Alle teksthandsamarar i heile verda kan lesa dette, det handlar berre om vilje. I MS sitt tilfelle: uvilje. Dei nektar å stå OpenOffice-formatet. I staden held dei fast på sitt krypterte, løynde format som ingen andre teksthandsamarar enn MSO Word kan opna utan å øydeleggja formateringa. Og det hjelper ikkje om du sit med MSO2007 og trur at MSO2003 kan lesa det. Nei, nei, dei har jo sjølvsagt endra den løynde koden mellom kvar programversjon, og dimed må du oppgradera (les: gå i raudt på banksaldoen din) for å i det heile teke kunne lesa dokumenta slik dei er meint å lesast. Eller du kan berre droppa MSO heilt, og gå over til eit alternativ. Det einaste eg enno ikkje får til ordentleg med OOo som MSO klarar betre, er database. MSO Access fungerer godt, det gjer ikkje OOo Base. Men så nyttar eg ikkje korkje Access eller Base, så det gjer meg ikkje så mykje.